Astananyń 20 jyldyǵyna oraı Ankarada Qazaqstannyń Túrkııadaǵy elshiliginiń uıymdastyrýymen «Uly dala Astanasy» halyqaralyq konferensııasy ótti.
Jıyndy quttyqtaý sózimen ashqan Qazaqstannyń Túrkııadaǵy Elshisi Abzal Saparbekuly «Qazaqstan Prezıdentiniń «Astana – eń aldymen azattyǵymyzdyń sımvoly, Qazaqstannyń jańa tarıhynyń shynaıy shejiresi, qarqyndy damýymyzdyń, qol jetken tabystarymyzdyń, abyroı-bedelimizdiń, bereke-birligimizdiń jarqyn kórinisi» degen ulaǵatty sózi árdaıym jadymyzdan shyqqan emes. Táýelsizdiktiń teńdessiz tartýy, azattyqtyń altyn arqaýy – jalpaq jurtymyzdy aıqyn bolashaqqa, kemel keleshekke jumyldyryp, damý jolyndaǵy ulttyq maqsat-múddelerimizdi bir arnaǵa toǵystyrdy. Osy tusta Otanymyzdyń júregi, táýelsizdigimizdiń tiregi – Astananyń aıtýly merekesine oraı Qazaqstan Respýblıkasynyń Túrkııadaǵy elshiligi Anadolý topyraǵynda birqatar mańyzdy sharalardy júzege asyryp, el tarıhyndaǵy eleýli oqıǵaǵa ózindik úles qosyp otyrǵanyn atap ótkim keledi.
Bizdiń memleketimiz úshin zor qýanyshymyzdy alǵashqylardyń biri bolyp bólisken Túrkııanyń orny bólek. Qazaqstan Prezıdenti Nursultan Nazarbaev «Biz Táýelsizdikti jarııaladyq, eki saǵattan keıin marqum Turǵyt О́zal maǵan telefon shalyp, «Túrkııa qoldaıdy» dedi. Bul qýanyshty esh ýaqytta esten shyǵarýǵa bolmaıdy» degen bolatyn. Kóp uzamaı baýyrlas eki el arasynda tyǵyz qarym-qatynas ornap, Astananyń irgetasy qalanýyna túrik ınvestorlary men kásipkerleri jáne qurylys kompanııalary belsene aralasty. Astananyń túrki álemine ortaq sáýlettik dızaıny, kógaldandyrýy men abattandyrylýy jáne ınfraqurylymynda da túrik baýyrlarymyzdyń qoltańbasy bar» dep atap ótti.
Jıynǵa arnaıy qatysqan Túrkııa Respýblıkasy Prezıdentiniń Bas keńesshisi Iаlchyn Topchýdyń óz sózinde «Bolashaqta qazirgi álem tarıhy jazylar ýaqytta Qazaqstan men qazaq túrkileri bóliminde «Tuńǵysh Prezıdent», «túrki dúnıesiniń Aqsaqaly Nursultan Nazarbaev», «Astana qalasy» degen sózder bir uǵymǵa aınalyp, qatar atalatyn bolady. Astana – «Asıtaneı Shahane», ıaǵnı «patshanyń tabaldyryǵy, tańǵajaıyp bas qala» degendi bildiredi. Bul anyqtama kezinde Ystanbul úshin qoldanylǵan edi. Memleketter men elderdiń qalyptasý tarıhynda uly kóshbasshylar qandaı rólge ıe bolsa, basty sheshimder shyǵarylǵan shaharlar da mańyzdy oryn alǵan. Astana áp-sátte egemen eldiń altyn tájine aınalyp úlgerdi»,- dedi.
Túrkııa Uly Ulttyq Májilisiniń eks-spıkeri Hıkmet Chetın, Túrkııanyń burynǵy Mádenıet mınıstri Namyk Kemal Zeıbek, Túrkııanyń burynǵy Densaýlyq saqtaý mınıstri Halıl Shyvgyn, Qoja Ahmet Iаsaýı ýnıversıteti О́kiletti keńesiniń tóraǵasy Musa Iyldyz jáne túrik zııaly qaýym, sheteldik dıplomattar, isker qaýym ókilderi qatysqan konferensııa barysynda Elshiliktiń tartýy retinde qazaq jáne túrik tilderinde jaryq kórgen «Uly dala Astanasy» kitabynyń tanystyrylymy ótti. Jınaqta Túrkııanyń saıası tulǵalary men zııaly qaýym ókilderiniń Astana men bas qalanyń avtory – Elbasy Nursultan Nazarbaev týraly 30 tarta saraptamalyq maqalalary, zertteý eńbekteri men jyly lebizderi jaryq kórgen. Jańa týyndy Túrkııa Respýblıkasynyń eks-prezıdenti Abdýlla Gúldiń «Ǵalamat jetistiktiń jemisi» atty maqalasymen bastalypty.
Konferensııada Astananyń qalyptasýy jáne damýy týraly ANKASAM zertteý ortalyǵynyń dırektory Mehmet Seıfettın Erol, TIKA tóraǵa orynbasary Mehmet Súrreııa Er, Eýrazııa Jazýshylar qaýymdastyǵynyń tóraǵasy Iаkýb Omaroǵly jáne YDA kompanııalar tobynyń basqarma múshesi Júneıt Arslan arnaıy baıandama jasady. Basqosý sońynda Astana kúnine arnalǵan merekelik qabyldaý sharasy ótti.
Elvıra Serikqyzy,
«Egemen Qazaqstan»